Abhistada Sri Brahma Stotram
namō hiraṇyagarbhāya brahmaṇē brahmarūpiṇē |
avijñātasvarūpāya kaivalyāyāmr̥tāya ca || 1 ||
yaṁ na dēvā vijānanti manō yatrāpi kuṇṭhitam |
na yatra vāk prasarati namastasmai cidātmanē || 2 ||
yōginō yaṁ hr̥dākāśē praṇidhānēna niścalāḥ |
jyōtirūpaṁ prapaśyanti tasmai śrībrahmaṇē namaḥ || 3 ||
kālāt parāya kālāya svēcchayā puruṣāya ca |
guṇatrayasvarūpāya namaḥ prakr̥tirūpiṇē || 4 ||
viṣṇavē sattvarūpāya rajōrūpāya vēdhasē |
tamasē rudrarūpāya sthitisargāntakāriṇē || 5 ||
namō buddhisvarūpāya tridhāhaṅkr̥tayē namaḥ |
pañcatanmātrarūpāya pañcakarmēndriyātmanē || 6 ||
namō manaḥ svarūpāya pañcabuddhīndriyātmanē |
kṣityādi pañcarūpāya namastē viṣayātmanē || 7 ||
namō brahmāṇḍarūpāya tadantarvartinē namaḥ |
arvācīna parācīna viśvarūpāya tē namaḥ || 8 ||
anityanityarūpāya sadasatpatayē namaḥ |
samastabhaktakr̥payā svēcchāviṣkr̥tavigraha || 9 ||
tava niśvasitaṁ dēvāḥ tava svēdō:’khilaṁ jagat |
viśvā bhūtāni tē pādaḥ śīrṣṇō dyauḥ samavartata || 10 ||
nābhyā āsīdantarikṣaṁ lōmāni ca vanaspatiḥ |
candramā manasō jātaḥ cakṣōḥ sūryastava prabhō || 11 ||
tvamēva sarvaṁ tvayi dēva sarvaṁ
stōtā stuti stavya iha tvamēva |
īśā tvayā vāsyamidaṁ hi sarvaṁ
namō:’stu bhūyō:’pi namō namastē || 12 ||
iti stutvā vidhiṁ dēvāḥ nipēturdaṇḍavat kṣitau |
parituṣṭastadā brahmā pratyuvāca divaukasaḥ || 13 ||
brahmōvāca |
yathārthayā:’nayā stutyā tuṣṭō:’smi praṇatāḥ surāḥ |
uttiṣṭhata prasannō:’smi vr̥ṇudhvaṁ varamuttamam || 14 ||
yaḥ stōṣyatyanayā stutyā śraddhāvān pratyahaṁ śuciḥ |
māṁ vā haraṁ vā viṣṇuṁ vā tasya tuṣṭāḥ sadā vayam || 15 ||
dāsyāmaḥ sakalān kāmān putrān pautrān paśūn vasu |
saubhāgyamāyurārōgyaṁ nirbhayatvaṁ raṇē jayam || 16 ||
aihikāmuṣmikān bhōgān apavargaṁ tathā:’kṣayam |
yadyadiṣṭatamaṁ tasya tattatsarvaṁ bhaviṣyati || 17 ||
tasmāt sarvaprayatnēna paṭhitavyaḥ stavōttamaḥ |
abhīṣṭada iti khyātaḥ stavō:’yaṁ sarvasiddhidaḥ || 18 ||
iti śrīskāndapurāṇē kāśīkhaṇḍē abhīṣṭada nāma śrī brahma stavam ||
